Keane áfram hjá bandarísku meisturunum

Írski landsliðsmaðurinn Robbie Keane hefur skrifað undir nýjan samning við Los Angeles Galaxy sem leikur í MLS-deildinni í Bandaríkjunum.

Keane, sem er 34 ára, hefur skorað 55 mörk í 91 leik fyrir LA Galaxy sem hann hefur leikið með frá árinu 2011.

LA Galaxy er ríkjandi meistari í MLS-deildinni en Keane skoraði 19 mörk fyrir liðið á síðasta tímabili.

Keane fær nýjan samherja í júlí þegar Steven Gerrard, fyrrverandi fyrirliði Liverpool, gengur til liðs við LA Galaxy. Keane og Gerrard spiluðu um skamma hríð saman með Liverpool og þekkjast því ágætlega.