Rosicky: Töpum ef við spilum eins og gegn Lettlandi

Tomas Rosicky, fyrirliði tékkneska landsliðsins, sat fyrir svörum blaðamanna fyrir æfingu liðsins á Laugardalsvelli í gær. Hann sagði þá að hann bæri mikla virðingu fyrir íslenska liðinu.

„Íslenska liðið er taktískt og vel skipulagt. Leikmenn eru með góða tækni og Íslendingar spiluðu vel gegn okkur síðast. Ég á von á svipuðu frá þeim í nú,“ sagði Rosicky.

Ísland vann fyrstu þrjá leiki sína í riðlinum án þess að fá á sig mark en tapaði svo fyrir Tékklandi í Plzen í haust. Strákarnir komust svo aftur á beinu brautina með 3-0 sigri á Kasökum ytra.

„Ísland getur komið hvaða lið sem er á óvart. Við þurfum að vera varkárir,“ sagði Rosicky.

Tékkar urðu fyrir áfalli um helgina er sóknarmaðurinn David Lafata, aðalframherji liðsins, varð fyrir meiðslum á æfingu landsliðsins. Hann verður því ekki með liðinu í kvöld.

„Það er slæmt að missa hann en það er samt ekki svo að fjarvera eins leikmanns breytir ekki liðinu og leikstílnum,“ sagði Rosicky spurður um málið. „Við viljum spila sókndjarfan fótbolta sem gaman er að horfa á.“

Tékkland gerði óvænt jafntefli gegn Lettlandi á heimavelli í mars síðastliðnum og tapaði þar með fyrstu stigum sínum í riðlinum. „Við verðum að spila betur en í þeim leik. Ef við spilum jafn illa og við gerðum gegn Lettlandi munum við tapa fyrir Íslandi.“