Blatter rak yfirmann vegna brandara

„Forseti FIFA, framkvæmdastjóri og yfirmaður samskipta eru saman í bíl. Hver er við stýrið? Lögreglan.“

Þetta var brandari sem Walter De Gregorio, yfirmaður samskiptamála hjá FIFA, lét falla í spjallþætti í svissnesku sjónvarpi á dögunum.

Fjölmiðlar í Bretlandi fullyrða að Sepp Blatter, fráfarandi forseti FIFA, hafi rekið De Gregorio vegna ummælanna en fram kom í tilkynningu frá sambandinu í dag að De Gregorio hafi látið af störfum.

Þetta kom fram á fréttavef BBC í kvöld.

Blatter tilkynnti á dögunum að hann muni stíga til hliðar sem forseti FIFA en líklegt er að nýr forseti verði kjörinn í desember.

Mikið hefur gengið á innan FIFA vegna rannsóknar bandarískra og svissneskra yfirvalda á spillingu innan sambandsins undanfarin ár og áratugi.