Sá sem elskar ekki Messi veit ekkert um fótbolta

"Sá sem elskar ekki Messi veit ekkert um fótbolta eða lífið sjálft," segir Carlos Tevez, leikmaður Juventus, þegar hann er spurður út í meint ósætti milli sín og Lionel Messi, leikmann Barcelona og samlanda sinn.

Þráðlátur orðrómur hefur verið uppi um meint ósætti Tevez og Messi og talað var um að það ósætti væri ástæðan fyrir því að Tevez var ekki valinn í landsliðið þegar Alejandro Sabella var þjálfari liðsins.

Tevez er hins vegar í argentíska hópnum í Copa America keppninni og þvertekur fyrir það að eitthvað ósætti sé í gangi þeirra á milli. Tevez segir að hann og Messi séu góðir félagar innan sem utan vallar.

"Við hlægjum af öllu sem sagt hefur verið. Við vitum að með augnsambandi eða faðmlagi  höfum við sagt meira en þúsund orð við hvorn annan. Það þarf ekki alltaf að tala saman til að segja hluti," segir Tevez.