Írar og Skotar skildu jafnir

Nú er nýlokið leik Írlands og Skotlands í undankeppni EM í fótbolta sem fram fór í Dublin. Þessi lið leika í D-riðli.

Leiknum lauk með 1-1 jafntefli. Jonathan Walters, leikmaður Stoke, kom Írum yfir með kolólöglegu marki á 38. mínútu. Daryl Murphy átti þá skalla að marki sem David Marshall varði en rangstæður Jonathan Walters var mættur til að pota boltanum yfir línuna.

Seinni hálfleikur var ekki nema tveggja mínútna gamall þegar Skotar jöfnuðu metin. Skot Shaun Maloney stefndi útaf en boltinn hafði viðkomu í John O'Shea og þaðan fór hann í markið. Markið skráist því sem sjálfsmark hjá O'Shea.

Eftir þennan leik eru Skotar í 2. sæti D-riðils með 13 stig en Þjóðverjar eiga leik til góða gegn Gíbraltar í kvöld. Það má því teljast ólíklegt að Skotar verði í 2. sæti þegar þessi dagur er allur. Írar eru í 4. sæti með 8 stig.