Þrjár þrennur í þremur leikjum hjá Ronaldo

Cristiano Ronaldo hefur nú skorað þrjár þrennur í síðustu þremur leikjum sem hann hefur spilað.

Ronaldo skoraði þrennu í gær þegar Portúgal gerði góða ferð til Armeníu í undankeppni EM og vann 3-2, eftir að hafa lent 0-1 undir í leiknum.

Fyrsta markið kom úr vítaspyrnu í fyrri hálfleik en í þeim síðari skoraði Ronaldo tvö mörk á þriggja mínútna kafla. Síðasta mark hans í leiknum var frábært skot af um 25 metra færi og dugði til að tryggja Portúgal sigur.

Þetta var níunda þrenna Ronaldo á þessu tímabili en hann endaði spænsku deildina með því að skora þrennu í tveimur síðustu leikjunum, gegn Espanyol á útivelli og gegn Getafe á heimavelli.

Ronaldo skoraði samtals 66 mörk í öllum keppnum, með félagsliði og landsliði, á þessu tímabili.

Hér er yfirlit yfir þær níu þrennur sem Ronaldo hefur skorað á tímabilinu:

20. september gegn Deportivo (ú)

23. september gegn Elche (h) - skoraði 4 mörk í leiknum

5. október gegn Athletic Bilbao (h)

6. desember gegn Celta Vigo (h)

5. apríl gegn Granada (h) - skoraði 5 mörk í leiknum

2. maí gegn Sevilla (ú)

17. maí gegn Espanyol (ú)

23. maí gegn Getafe (h)

13. júní gegn Armeníu (ú)