Wambach kennir gervigrasi um markaþurrð í síðasta leik

Abby Wambach, landsliðskona og helsta stjarna bandaríska landsliðsins í fótbolta, segir að bandaríska liðið væri búið að skora meira ef leikið væri á náttúrulegu grasi á HM í Kanada sem nú stendur yfir.

Bandaríkin unnu Ástralíu 3-1 í fyrsta leik sínum en gerðu síðan 0-0 jafntefli við Svíþjóð í þeim næsta. Þriðji og síðasti leikur bandaríska liðsins er gegn Nígeríu 16. júní.

Í leiknum gegn Ástralíu klúðraði Wambach tveimur góðum skallafærum, færum sem hún er vön að klára með marki. Wambach fékk einnig færi gegn Svíum þar sem hún skalli í jörðina áður en markvörður Svía náði að slá boltann yfir.

"Ég held að ég hefði skorað á náttúrulegu grasi. Skallinn hjá mér á móti Svíum skoppar á þurru gervigrasi og skoppar hærra. Ef boltinn skoppar á venjulegu grasi er erfiðara fyrir markmann að bregðast við," segir Wambach.

Wambach tekur þó fram að bandaríska liðið verði að aðlagast öllum þeim breytum sem kunna að koma upp við ýmsar aðstæður.

"Lið sem verða meistarar eru lið sem geta brugðist við öllum mögulegum hlutum, á öllum stundum, á alla vegu," segir Wambach.

Mikið hefur verið rætt og ritað um það að leikið sé á gervigrasi á HM og í aðdraganda mótsins var jafnvel talað um að meiðslahætta væri meiri á gervigrasi en náttúrulegu grasi. Það hefur hins vegar aldrei verið sannað.