Miklu betra þegar fótboltakonurnar eru ekki lengur klæddar eins og strákar

Marco Aurelio Cunha, einn af háttsettustu mönnum kvennafótboltans í Brasilíu, er á því að vaxandi vinsældir kvennafótboltans séu vegna þess að knattspyrnukonurnar geri nú meira í því að passa upp á útlit sitt inn á vellinum.

Marco Aurelio Cunha heldur því fram að leikmenn í dag noti meira af andlitsfaðra, sinni hári sínu betur og klæðist styttri buxum. Hann lét þessi orð falla í kjölfar þess að hin brasilíska Marta varð markahæsti leikmaður HM kvenna frá upphafi.

Marco Aurelio Cunha er að reyna að berjast fyrir því að kvennafótboltinn fái meiri athygli í Brasilíu þar sem karlarnir hafa nánast einokað sviðsljósið.

„Nú eru knattspyrnukonurnar fallegri og nota meira af andlitsfaðra. Þær ganga inn á völlinn með meiri þokka en áður," sagði Marco Aurelio Cunha við kanadíska blaðið Globe and Mail.

„Knattspyrnukonur gerðu meira af því áður að apa eftir knattspyrnukörlum. Treyjurnar voru meira hannaðar fyrir karla. Við vorum því vön því að klæða fótboltakonurnar okkar eins og stráka. Það vantaði því upp á kvenleikann og þokkann hjá liðunum. Nú eru buxurnar styttri og þær gera meira fyrir hárið sitt. Þetta eru ekki lengur konur klæddar eins og karlmenn," sagði Cunha.

„Knattspyrnukonur eru fallegar ef fyrirgefur orðalagið. Þær hafa líka þegar aðrar reglur en karlarnir eins og það að boltinn þeirra er léttari. Það hefur því þegar verið tekin ákvörðun um að gera leikinn meira fagurfræðilegri og af hverju ekki að láta þá ná yfir tískuna líka," sagði Cunha.

Lokaleikirnir í riðlakeppni HM kvenna í fótbolta í Kanada standa yfir þessa dagana þar sem liðin keppast um að komast í sextán liða úrslitin. Brasilíska liðið hefur unnið tvo fyrstu leiki sína og hefur þegar tryggt sér sæti í útsláttarkeppninni.