Paragvæ í góðri stöðu eftir sigur á Jamaíku

Paragvæ er komið í góða stöðu í B-riðli Suður-Ameríkukeppninnar eftir 1-0 sigur á Jamaíku í Antofagasta í Chile í kvöld.

Paragvæar náðu í óvænt stig gegn Argentínu í fyrsta leik sínum og eru því komnir með fjögur stig í riðlinum og svo gott sem öruggir áfram.

Édgar Benítez skoraði eina mark leiksins á 36. mínútu en Paragvæ var talsvert sterkari aðilinn í kvöld.

Jamaíka, sem er önnur tveggja gestaþjóða á mótinu, er án stiga eftir fyrstu tvo leikina og á veika von um að komast áfram.

Eftir hálftíma hefst leikur Úrúgvæ og Argentínu í sama riðli.