Svíar líta á sig sem fórnarlamb geðþáttaákvörðunar FIFA

Sænska kvennalandsliðið, sem er í fimmta sæti heimslistans, er hugsanlega á heimleið frá HM kvenna í fótbolta eftir að hafa gert jafntefli í öllum þremur leikjum liðsins í riðlakeppni HM í Kanada.

Svíarnir þurfa að treysta á úrslit úr öðrum riðlum til þess að komast áfram sem eitt af fjórum liðum með besta árangur í þriðja sæti.

Blaðamaður Dagens Nyheter skrifar grein í dag þar sem hann segir Svía vera fórnarlamb geðþáttaákvörðunar FIFA.

Svíar eru ekki sáttir með að hafa verið teknir úr fyrsta styrkleikaflokki þegar dregið var í riðla en svo fór að lokum að sænska liðið lenti í mjög erfiðum riðli með Bandaríkjunum, Ástralíu og Nígeríu. Svíar gerði markalaust jafntefli við bandaríska liðið, 3-3 jafntefli við Nígeríu og loks 1-1 jafntefli í lokaleiknum við Ástralíu í leik sem liðið mátti alls ekki tapa.

Svíar áttu að öllu eðlilegu að vera í fyrsta styrkleikaflokki í HM-drættinum en FIFA ákvað að taka af þeim sætið og hleypa Brasilíumönnum þess í stað upp í efsta flokkinn þar sem Alþjóðasambandið vildi sjá fulltrúa fleiri heimsálfa meðal þeirra sex þjóða sem skipuðu efsta styrkleikaflokknum.

Svíþjóð og Bandaríkin lentu því saman í riðli en bæði eru þau í hóp fimm bestu landsliða heims samkvæmt styrkleikalista FUFA. Ástralir eru síðan í 10. sæti á FIFA-listanum. Brasilíumenn lentu aftur á móti í riðli með Spáni (14. sæti), Suður-Kóreu (18. sæti) og Kosta Ríka (37. sæti).

Hollendingar, Kamerún og Sviss eru öll komin áfram í sextán liða úrslit í sinni fyrstu heimsmeistarakeppni enda í mun léttari riðlum en sænsku stelpurnar munu hinsvegar naga neglur yfir leikjum kvöldsins.

Norðmenn voru mun heppnari með riðil þrátt fyrir að hafa lent í riðli með Þýskalandi því hin liðin voru Tæland (29. sæti á FIFA-listanum) og Fílabeinsströndin (67. sæti).

Svíar voru með þrjú stig og markatöluna 4-4 eftir riðlakeppnina og það gæti dugað þeim til að komast áfram upp úr 3. sæti. Sviss og Holland urðu líka í 3. sæti í sínum riðlum en eru með betri árangur en Svíþjóð og hafa þegar tryggt sér tvö af þeim fjórum sætum sem liðin í 3. sæti riðlanna sex fá.

Það er jafnframt ljóst að árangur Tæland dugar ekki og þær tælensku eru því úr leik. Liðin sem enda í þriðja sæti í E- og F-riðli geta hinsvegar bæði verið fyrir ofan Svíana. Mestar vonir Svíana liggja í því að liðið úr þriðja sæti E-riðils nái ekki betri árangri. Leikirnir í E-riðli hefjast þó ekki fyrr en klukkan 23.00 í kvöld.

Það stefnir því í stresskvöld hjá sænsku stelpunum út í Kanada.