Neymar sá rautt og Brasilía tapaði

Brasilía tapaði í nótt fyrir Kólumbíu, 1-0, í Suður-Ameríkukeppninni sem nú fer fram í Síle. Brasilíumaðurinn Neymar fékk rautt spjald í leiknum.

Neymar fékk reisupassann fyrir að sparka boltanum að Pablo Armero, leikmanni Kólumbíu, rétt eftir að leikurinn var flautaður af. Carlos Bacca brást illa við, ýtti við honum, og fékk þá líka að líta rauða spjaldið.

Jeison Murillo skoraði eina mark leiksins á 36. mínútu er hann skoraði af stuttu færi.

Venesúela mætir Perú í kvöld og getur með sigri náð þriggja stiga forystu á toppi riðilsins. Brasilía og Kólumbía eru bæði með þrjú stig eftir tvo leiki en Perú er án stiga eftir einn leik.

Brasilía vann Kólumbíu, 2-1, í 8-liða úrslitum HM síðasta sumar og var mikill hiti í leikmönnum í þeim leik, rétt eins og í nótt. Sigurinn var nauðsynlegur fyrir Kólumbíu sem tapaði óvænt fyrir Venesúela í fyrsta leik sínum í keppninni. Þar að auki hafði Kólumbía ekki unnið Brasilíu síðan 1991.

Sóknarmaðurinn Radamel Falcao átti slæman leik gegn Venesúela og en Kólumbíumaðurinn, sem hefur verið sterklega orðaður við Chelsea, kom lítið við sögu í leiknum í nótt.