Tvö rauð spjöld og tvö víti þegar Svíar unnu Ítali

Svíar unnu 2-1 sigur á Ítölum í kvöld þrátt fyrir að lenda bæði manni og marki undir í fyrsta leik liðanna í úrslitakeppni 21 ára landsliða í fótbolta sem hófst í gær í Tékklandi.

Svíar tryggðu sér sigurinn með marki úr vítaspyrnu fjórum mínútum fyrir leikslok en þeir léku manni færri í 52 mínútur í þessum leik.

Dómari leiksins, Anastasios Sidiropoulos frá Grikklandi, dæmdi tvö víti og gaf tvö rauð spjöld í þessum leik en alls fóru átta spjöld á loft.

Svíar urðu fyrir áfalli á 28. mínútu leiksins þegar Alexander Milosevic, leikmaður Besiktas, fékk rautt spjald og dæmt á sig víti. Domenico Berardi, leikmaður Juventus, kom ítalska liðinu í 1-0 með því að skora úr vítaspyrnunni.

John Guidetti, leikmaður Celtic, jafnaði metin á 56. mínútu eftir stoðsendingu frá Oscar Lewicki og tíu mínútum fyrir leikslok var síðan Ítalanum Stefano Sturaro, leikmanni Juventus, vikið af velli með beint rautt spjald.

Kiese Thelin, leikmaður franska liðsins Bordeaux, skoraði síðan sigurmarkið á 86. mínútu, eða aðeins sex mínútum síðar, eftir að varamaðurinn Mikael Ishak fiskaði víti á markvörðinn Francesco Bardi.

Svíar og Ítalir eru í riðli með Englandi og Portúgal en þau mætast seinna í kvöld.

Norðurlandaþjóðirnar Danmörk og Svíþjóð hafa því unnið tvo fyrstu leikina á móti en Danir unnu 2-1 sigur á heimamönnum í Tékklandi í opnunarleik mótsins í gær. Í hinum leiki A-riðilsins gerðu Þjóðverjar og Serbar 1-1 jafntefli.