Fullyrt að Mandzukic fari til Juventus

Ítalskir fjölmiðlar greindu frá því í gærkvöldi að Juventus væri búið að ganga frá kaupum á króatíska sóknarmanninum Mario Mandzukic frá Atletico Madrid.

Kaupverðið er sagt vera átján milljónir evra, jafnvirði 2,7 milljarða króna. Mandzukic mun samkvæmt fréttum á Ítalíu skrifa undir fjögurra ára samning við Ítalíumeistarana.

Manchester United hafði einnig augastað á Mandzukic en fyrr í mánuðinum var fullyrt að leikmaðurinn væri efstur á óskalista Louis van Gaal, stjóra United.

Mandzukic átti misjöfnu gengi að fagna hjá Atletico í vetur en sögusagnir voru á kreiki um að honum hafi sinnast við þjálfaralið félagsins, sem hefði því einsett sér að selja kappann í sumar.