Mamman bað um að sonurinn yrði seldur

Adrien Rabiot, tvítugur miðjumaður sem er á mála hjá frönsku meisturunum í PSG, vill losna frá félaginu.

Þetta staðfesti Veronique, móðir hans, í samtali við franska fjölmiðla en hún er einnig umboðsmaður hans.

Það hefur verið algengt að feður og bræður leikmanna starfi fyrir þá sem ráðgjafar eða umboðsmenn en Rabiot er einn fárra sem er með móður sína í því hlutverki.

Rabiot samdi við PSG árið 2012 og hefur síðan þá komið við sögu í 52 deildarleikjum. Hann er þó fyrir aftan Blaise Matuidi í goggunarröðunni og Veronique Rabiot telur að sonur hennar þurfi að spila meira.

„Adrien elskar PSG. Hann er samningsbundinn félaginu og væri helst til í að verja ferli sínum þar. En það er ekki mögulegt,“ sagði hún.

„Hann þarf að spila 35 leiki á tímabili svo hann haldi áfram að taka framförum. Það mun ekki gerast hjá PSG á næsta tímabili.“