Dramatískur sigur Bandaríkjanna | Aron í byrjunarliðinu

Aron Jóhannsson var í byrjunarliði Bandaríkjanna sem unnu 3-4 sigur á Hollandi í vináttulandsleik á Amsterdam ArenA, heimavelli Ajax, í kvöld.

Aron var í fremstu víglínu bandaríska liðsins og lék fyrstu 65 mínútur leiksins. Þegar hann fór af velli var staðan 3-1, Hollandi í vil. Klaas-Jan Huntelaar skoraði tvö marka Hollendinga og lagði það þriðja upp fyrir Memphis Depay, nýjasta liðsmann Manchester United.

Gyasi Zardes jafnaði metin í 1-1 fyrir Bandaríkin sem áttu svo magnaðan endasprett í leiknum.

John Brooks minnkaði muninn í 3-2 á 70. mínútu og þannig var staðan þangað til ein mínúta var til leiksloka. Þá jafnaði Daniel Williams metin og á lokamínútu tryggði Bobby Wood Bandaríkjunum sigur en hann kom inn á sem varamaður fyrir Aron.

Bandaríkin mæta Þýskalandi í öðrum vináttulandsleik á miðvikudaginn en framundan hjá liðinu er svo þátttaka í Gullbikarnum, álfukeppni Norður- og Mið-Ameríku og karabíska hafsins.