Neymar: Dunga getur komið okkur aftur á toppinn

Neymar, fyrirliði brasilíska landsliðsins, segir að Dunga geti komið Brasilíu upp í hæstu hæðir á nýjan leik.

Dunga tók öðru sinni við þjálfun brasilíska landsliðsins eftir HM 2014 en liðið hefur unnið alla átta leikina undir hans stjórn með markatölunni 18-3.

Dunga gerði Neymar að fyrirliða og það virðist hafa gert sóknarmanninum gott því hann hefur gert átta mörk í þessum átta sigurleikjum Brasilíu.

„Það er alltaf nóg af hæfileikaríkum leikmönnum í Brasilíu og við erum með frábært lið sem getur komist aftur í fremstu röð,“ sagði Neymar en hann verður í eldlínunni í Suður-Ameríkukeppninni í Chile sem hefst 11. júní þar sem Brasilía er með Kólumbíu, Perú og Venesúela í riðli.

„Ef við höldum áfram að æfa vel, stöndum saman og förum eftir því sem þjálfarinn segir getum við komist á toppinn á nýjan leik,“ bætti Neymar við en hann hefur átt frábært tímabil með Barcelona.

Börsungar tryggðu sér Spánarmeistaratitilinn um síðustu helgi og eiga góða möguleika á að vinna þrennuna svokölluðu en liðið er komið í úrslitaleik bikarkeppninnar og Meistaradeildar Evrópu.