Titanic í Smáralind

Það var stór stund í dag þegar eftirgerðin af Titanic skipinu sem Brynjar Karl Birgisson, tólf ára hefur smíðað úr Legókubbum var afhjúpuð fullgerð í Hagkaup í Smáralind.

Það var fyrir tæpu ári síðan sem Brynjar Karl, sem er einhverfur, ákvað að ráðast í byggingu sex og hálfs metra langrar eftirmynd af uppáhaldsskipinu sínu, Titanic, úr Legokubbum. Nú er það tilbúið og Brynjar er stoltur af afrakstrinum.

Skipið er stórvirki og telur  56 þúsund kubba.

Gestir geta sett legokarla á skipið en markmiðið er að safna 2224, jafn mörgum og var af farþegum á skipinu árið 1912.

Verkefnið sem hann tókst á við hefur breytt lífi hans. Hann segir marga vini hans hafa verið vantrúaða þegar verkið hófst.

Brynjar hefur einnig gefið út bók, þar sem hann segir sögu verkefnisins. Bókin ber titilinn: Minn einhverfi stórhugur, og í henni felst mikil hvatning til annarra barna að fylgja draumum sínum.

Verkefnið hefur einnig aflað honum fleiri vina og hann er þakklátur.

Brynjar og Alexander Birgir Björnsson þáðu í dag viðurkenningu fyrir störf sín í þágu einhverfra en Alexander er einhverfur ungur maður í Grindavík sem tók sig til og fékk allar skærustu tónlistarstjörnur landsins til að mæta á tónleika sem hann hélt undir yfirskriftinni „Ég og fleiri frægir". Tónleikarnir voru til styrktar Birtu og einhverfusamtökunum.

Sjá má innslagið í spilaranum að ofan, þegar rúmar tólf mínútur eru liðnar af fréttatímanum.