Reykjavík dregur hagvöxtinn áfram á næstu árum

Framkvæmt verður fyrir tugi milljarða í Reykjavík á þessu ári og munar þar mest um mikla fjölgun hótelherbergja og stórar framkvæmdir við hafnarsvæði borgarinnar. Borgarstjóri segir útlit fyrir að Reykjavík muni draga áfram hagvöxt á Íslandi á næstu fimm til tíu árum.

Dagur B. Eggertsson borgarstjóri kynnti þær miklu framkvæmdir sem framundan eru í borginni á þessu ári á opnum kynningarfundi í ráðhúsinu í morgun. Borgin sjálf mun framkvæma fyrir tæpa tíu milljarða króna í skóla- og tómstundarbyggingum sem og ýmsum innviðum borgarinnar, en einkaaðilar munu hins vegar fara í enn meiri framkvæmdir en borgin samkvæmt þeim áætlunum sem þegar liggja fyrir.

„Reykjavík mun draga hagvöxt á Íslandi alla vegna næstu fimm til tíu ár sýnist okkur. Í fyrsta lagi eru þetta miklar fjárfestingar í hótelum og ferðaþjónustu. Um fimmtán hundruð herbergi sem eru að klárast eða fara af stað á þessu ári og næsta. Í öðru lagi eru þetta miklar nýjar fjárfestingar í tengslum við þekkingariðnað við háskólana og Landsspítalann í Vatnsmýrinni,“ segir borgarstjóri.

Þá séu í þriðja lagi mörg ný verkefni að koma inn á hafnarsvæðum borgarinnar;  við Gömlu höfnina, Sundahöfn og höfnina á Grundartanga.

„Og það eru mjög stórar tölur þar ef allt gengur eftir. Við erum líka að búa í haginn fyrir grænan iðnað á nýjum atvinnusvæðum. Við erum að opna ný blönduð svæði sem verða bæði íbúðir og atvinnusvæði í samræmi við nýja aðalskipulagið. Síðan á ég líka von á tíðindum af skapandi greinum og uppbyggingu í þágu þeirra. Þannig að þetta er bæði meira og miklu fjölbreyttara en við höfum séð áður,“ segir Dagur.

Ráðist verður í breytingar á Geirsgötunni ofan við gömlu höfnina í sumar en gatnamótum hennar við Lækjargötu verður breytt í tengslum við þær miklu byggingaframkvæmdir sem framundan eru á reitunum milli Hörpu og Hafnarstrætis á næstu árum. Meðal annars verður ráðist í byggingu 250 herbergja hótels við Hörpu strax í haust eins og greint var frá í fréttum okkar í gær.

Þá reiknar borgin með nýrri samgöngumiðstöð við BSÍ sem þjóna muni fjölbreyttum samgöngutækjum í og við borgina. Vestubæjarskóli verður stækkaður, framkvæmdir eru hafnar við stækkun Sundhallarinnar í Reykjavík og miklar framkvæmdir standa fyrir dyrum í efri byggðum borgarinnar bæði hvað varðar skóla og gatnakerfi.

Við fjöllum nánar um þetta mál með myndrænum hætti í kvöldfréttum Bylgjunnar og Stöðvar tvö klukkan hálf sjö.