Fara ekki fram á sýknu yfir Tsarnaev

Málflutningi verjenda Dzhokhar Tsarnaev, sem sakaður er um að hafa átt aðild að sprengjuárásinni í Boston fyrir tveimur árum, lauk í dag. Málflutningurinn tók einungis einn dag og kölluð voru til fjögur vitni

Verjendurnir upplýstu við upphaf réttarhaldanna að Tsarnaev hefði tekið þátt í árásinni og fara þeir því ekki fram á sýknu. Hafa þeir því leitast við að færa sönnur á að hann hefði ekki tekið þátt í skipulagningu árásarinnar og reyna þannig að komast hjá dauðarefsingu. Bera þeir því við að Tsarnaev hafi ekki verið virkur þátttakandi, hann hafi leiðst út á ranga braut í lífinu og hefði verið undir áhrifum bróður síns.

Saksóknarar luku sínum málflutningi í gær. Kölluðu þeir til 92 vitni á fimmtán dögum og fara fram á dauðarefsingu yfir Tsarnaev. Lokaávörp verða flutt hinn sjötta apríl og tekur kviðdómur þá við.