Hart tekið á gyðingahatri í stúkunni

Chelsea hefur sent stuðningsmönnum félagsins að afar hart verði tekið á gyðingahatri og öllu öðru kynþáttaníði í leik liðsins gegn Tottenham í úrslitum ensku deildabikarkeppninnar um helgina.

Það vakti gríðarlega athygli í síðustu viku er stuðningsmenn Chelsea meinuðu þeldökkum manni aðgang að neðanjarðarlest eftir leik liðsins gegn PSG í París. „Við erum rasistar, við erum rasistar og þannig viljum við hafa það,“ sungu þeir þá en atvikið náðist á myndband.

Sjá einnig: Stuðningsmenn Chelsea hentu manni úr lest í París

Forráðamönnum Chelsea er því mikið í mun að ekkert slíkt heyrist í stúkunni á Wembley-leikvanginum á sunnudag en Tottenham hefur í gegnum tíðina notið mikils stuðnings samfélags gyðinga í Lundúnum.

Eigandi Chelsea, Rússinn Roman Abramovitsj, er sjálfur gyðingatrúar en í tilkynningu sem birtist á heimasíðu félagsins í gær var skýrt tekið fram að hvers kyns notkun slanguryrða eða annað af þeim toga yrði ekki liðið.

Sjá einnig: Mourinho skammst sín vegna stuðningsmanna Chelsea

Þeir sem gerast sekir um slíka hegðun mega eiga von á því að verða settir í bann af félaginu og jafnvel sóttir til saka.