Messi verður líklega bara varamaður í „El Clasico"

Lionel Messi æfði á ný með aðalliði Barcelona í gær en þetta er í fyrsta sinn í sjö vikur sem hann gerir það. Mikil bjartsýni er í herbúðum Barca að Argentínumaðurinn geti snúið aftur eftir meiðslin í næsta leik liðsins.

Næsti leikur Barcelona-liðsins er enginn smáleikur því það er sjálfur „El Clasico" á móti Real Madrid á laugardaginn kemur. Spænskir fjölmiðlar búast þó aðeins við því að Messi verði varamaður í leiknum.  

Hinn 28 ára gamli Lionel Messi hefur ekkert spilað með Barcelona síðan að hann meiddist á hné 26. september síðastliðinn.

Neymar og Luis Suarez hafa farið á kostum í forföllum Messi og eru saman með 20 mörk í 11 deildarleikjum, Neymar hefur skorað 11 en Suarez 9.

Það eru þó ekki allir svo sannfærðir um að það geri Messi gott að snúa aftur á móti Real Madrid. Læknir argentínska landsliðið telur að það sé hætta á að meiðslin taki sig upp aftur spili Messi strax um næstu helgi.

Lionel Messi hefur misst af síðustu fimm deildarleikjum Barcelona. Liðið tapaði þeim fyrsta 2-1 á móti Sevilla en hefur síðan unnið fjóra leiki í röð og skoraði í þeim 13 mörk. Barcelona er með þriggja stiga forskot á Real Madrid fyrir leik liðanna um helgina.