Stórsigur Frakka | England mætir Noregi

Keppni í F-riðli á HM í Kanada lauk í kvöld með tveimur leikjum.

Frakkar unnu öruggan sigur á Mexíkó með fimm mörkum gegn engu en þessi stórsigur tryggði franska liðinu sigur í riðlinum. Mexíkó fékk hins vegar aðeins eitt stig í leikjunum þremur í riðlakeppninni og er á heimleið.

Marie Laure Delie kom Frakklandi yfir strax á 1. mínútu og átta mínútu síðar skoraði Mexíkó sjálfsmark.

Eugenie Le Sommer kom Frökkum í 3-0 á 13. mínútu og hún var aftur á ferðinni á 36. mínútu.

Frakkar létu eitt mark duga í seinni hálfleik. Það gerði Amandine Henry á 80. mínútu.

Frakkland fékk sex stig í F-riðli, jafnmörg og England, en markatala þeirra frönsku var betri (+4 gegn +1). Frakkar mæta liðinu sem endar í 2. sæti E-riðils í 16-liða úrslitunum. Keppni í E-riðli klárast í nótt en Kosta Ríka, Spánn og Suður-Kóreu berjast um 2. sætið.

Englendingar unnu 2-1 sigur á Kólumbíu á Ólympíuleikvanginum í Montreal.

England leiddi 2-0 í hálfleik með mörkum Karen Carney og Fara Williams úr vítaspyrnu.

Lady Andrade hleypti spennu í leikinn þegar hún minnkaði muninn í 2-1 á fjórðu mínútu í uppbótartíma en Kólumbía hafði ekki nógu mikinn tíma til að skora jöfnunarmark og England fagnaði því sigri.

England mætir Noregi í 16-liða úrslitunum á mánudaginn í Ottawa. Kólumbíska liðið endaði í 3. sæti riðilsins og mætir annað hvort Japan eða Bandaríkjunum í 16-liða úrslitunum.