Rútubílstjóri lést í skólaferðalagi

Rúta með þrjátíu og fjórum skólakrökkum og sex umsjónarmönnum valt á hraðbraut í Belgíu í morgun með þeim afleiðingum að bílstjóri hennar lést. Fimmtán voru fluttir á slysadeild og er einn þrettán ára drengur á gjörgæslu vegna höfuðmeiðsla sem hann hlaut í slysinu.

Börnin eru öll á aldrinum 11 til 13 og voru í skólaferðalagi.

Rútan var á vegum bresks fyrirtækis sem sérhæfir sig í skólaferðum. Hún valt á hraðbrautinni, en vitni segja að henni hafi verið ekið á brúarstólpa samkvæmt BBC. Annar bílstjóri frá Norður-Írlandi er sagður alvarlega slasaður.

Skólastjóri krakkanna segir að unnið sé að því að koma börnunum heim sem fyrst og að einhverjir foreldrar hafi jafnvel farið að sækja þau.