Stelpurnar töpuðu síðasta leiknum á EM | Myndir

Ísland er úr leik á Evrópumeistaramóti kvennalandsliða sautján ára og yngri sem nú stendur yfir á Íslandi.

Stelpurnar töpuðu fyrir Spánverjum í kvöld, 2-0, en fyrirliðinn Patricia Guijarro og Andrea Sierra skoruðu mörk Spánar í leiknum. Staðan í hálfleik var 1-0.

Spánn tryggði sér með sigrinum efsta sæti riðilsins en Þýskaland varð í öðru sæti með sex stig eftir 5-0 stórsigur á Englandi, sem fékk fjögur stig. Ísland tapaði öllum sínum leikjum í riðlakeppninni.

Sviss varð efst í B-riðli en liðið vann Frakkland á Fylkisvelli, 2-1. Bæði lið voru þó búin að tryggja sér sæti í undanúrslitum keppninnar. Þá vann Noregur sigur á Írlandi, 2-0, og endaði þar með í þriðja sæti riðilsins með fjögur stig. Írland fékk ekkert.

Spánn mætir Frakklandi í undanúrslitunum á miðvikudag og Þýskaland leikur gegn Sviss.