Stórleikur Guðbjargar dugði ekki til

Norska liðið LSK féll úr leik í Meistaradeildinni í kvöld eftir að leikur liðanna endaði í vítaspyrnukeppni.

Frankfurt vann fyrri leikinn í Noregi, 0-2, og það var því verk að vinna fyrir LSK.

Norska liðið byrjaði leikinn af miklum krafti og Emma Lundh kom þeim yfir eftir aðeins 12 mínútna leik. Þannig stóðu leikar í hálfleik. Þegar 20 mínútur lifðu leiks komst LSK síðan í 0-2 er fyrirliðinn Marita Lund skoraði. Mögnuð endurkoma hjá norska liðinu.

Meira var ekki skorað í venjulegum leiktíma og því varð að framlengja. Ekki kom mark þar og því varð að grípa til vítaspyrnukeppni.

Bæði lið skoruðu úr fyrstu fjórum spyrnum sínum en LSK misnotaði fimmtu spyrnuna. Það gerði Frankfurt aftur á móti ekki og komst þar með í átta liða úrslit keppninnar.

Guðbjörg varði eins og berserkur allan leikinn en stórleikur hennar dugði því miður ekki til.