365 gígapixla mynd af Mont Blanc er stærsta ljósmynd allra tíma

Alþjóðlegur hópur ljósmyndara, undir forystu hins ítalska Filippo Blengini, birti á dögunum á vefsíðunni in2white.com stærstu ljósmynd allra tíma.

Myndin, sem er panoramaljósmynd af fjallinu Mont Blanc á landamærum Ítalíu og Frakklands, er 365 gigapixlar að stærð og um 45 gigapixlum stærri en fyrri methafi - ljósmynd af Lundúnarborg sem tekin var árið 2013. 

Myndin af Mont Blanc er í slíkri upplausn að nær endalaust má skruna inn án þess að myndgæðin skerðist svo nokkru nemi.

Ljósmyndarahópurinn samanstóð af fimm einstaklingum sem vörðu tveimur vikum á snæviþökktu fjallinu í um 3500 metra hæð en hitastigið var yfirleitt um -10°C. 

Með þremur myndavélum; Canon 70D DSLR, Canon EF 400mm f/2.8 II IS og Canon Extender 2X III sem komið var fyrir á sjálfvirkum þrífóti tók hópurinn alls 70 þúsund ljósmyndir á þrjátíu og fimm klukkustundum. 

Tvo mánuði tók svo að raða ljósmyndunum saman en hér að neðan má sjá stutt myndband frá gerð ljósmyndarinnar. 

Sjálfa ljósmyndina má nálgast á gagnvirkri vefsíðu verkefnisins.