Stór mistök eru að kosta okkur stig

Tomas Rosicky, fyrirliði Tékklands, sagði eftir leikinn í gær að mistök Tékka hafi fært Íslandi sigur og að Tékkar þurfi ekkert að fara á taugum þó þessi leikur hafi tapast.

"Við græðum ekkert á því. Við erum búnir að vinna fjóra leiki og óþarfi að fara á taugum. Við ætlum okkur að vinna Kasakstan og Lettland og koma a.m.k. öðrum fætinum í úrslitakeppnina. Það á enn mikið eftir að gerast," segir Rosicky.

"Eftir markið okkar héldum við áfram að pressa þá. Ísland sótti í sig veðrið og fór að pressa okkur. Þeir virtust vera ánægðir með jafntefli og þetta var jafn leikur en við gáfum þeim seinna markið," sagði Rosicky.

"Við erum að gera stór mistök sem eru að kosta okkur stig. Bæði gegn Lettum og í þessum leik. Á þessu stigi er þér refsað fyrir mistök. Við þurfum bara að læra af þessum mistökum," sagði Rosicky.