Jackson Martinez til AC Milan

Kólumbíski framherjinn Jackson Martinez hefur ákveðið að ganga í raðir AC Milan. Þetta staðfestir Pinto da Costa, forseti Porto. Kaupverðið er 35 milljónir evra, um 5,2 milljarðar króna.

Talið er að Arsenal hafi haft augastað á Martinez en hann er sagður vera á leið í læknisskoðun hjá AC Milan. Í samningi hans við Porto kom fram að Martinez mætti fara ef félag byði 5,2 milljarða í hann.

"Jackson Martinez hefur valið Milan. Áður en hann fór í frí tilkynnti hann mér að hann vildi fara. Þessi klásúla í samningi hans er ekki til umræðu og félög verða að greiða þessa upphæð.

Ég var að frétta að hann hafi valið Milan. Þetta er það sem hann vill, áfangastaðurinn skiptir mig engu máli. Ég vil bara að hann sé ánægður," segir Costa.

Arsene Wenger, stjóri Arsenal, hafði áður lýst yfir aðdáun sinni á leikmanninum. En Martinez er 28 ára og hefur skorað 67 deildarmörk á síðustu þremur tímabilum með Porto.

"Hann er sterkur. Hann er leikmaður sem getur búið sér til pláss í teignum. Hann gæti spilað í úrvalsdeildinni þar sem hann hefur skrokkinn til að gera það. Hann notar skrokkinn á mjög áhrifaríkan hátt og er góður að klára færi. Hann er á lista hjá mörgum liðum," sagði Wenger um Martinez í febrúar síðastliðnum.