Brasilía komið í 16 liða úrslit

England vann sinn fyrsta sigur á HM kvenna í kvöld þegar liðið lagði Mexíkó að velli, 2-1. Hin 157 cm. háa Fran Kirby, leikmaður Reading, skoraði fyrra markið Englands og Karen Carney, leikmaður Birmingham, það síðara. Fabiola Ibarra minnkaði muninn fyrir Mexíkó í uppbótartíma.

Þetta var fyrsti sigur Englands á HM en liðið tapaði fyrir Frakklandi í fyrsta leik sínum. England og Frakkland eru í 2.-3. sæti F-riðils með 3 stig en Kólumbía situr á toppi riðilsins með 4 stig eftir sögulegan sigur á Frakklandi fyrr í dag. Mexíkó er á botninum með 1 stig.

Þá vann Brasilía 1-0 sigur á Spánverjum með marki frá Andressa Alves, leikmanni Boston Breakers, einni mínútu áður en flautað var til hálfleiks.

Brasilía tryggði sér þar með sæti í 16 liða úrslitum en brasilísku stelpurnar hafa unnið báða sína leiki á HM hingað til, unnu Suður Kóreu 2-0 í fyrstu umferð. Spánn er í 2. sæti með 1 stig eftir jafntefli við Kosta Ríka í fyrstu umferð.