Staðfestir dóm um að heimilt verði að slökkva á öndunarvél lamaðs manns

Mannréttindadómstóll Evrópu hefur staðfest dóm fransks dómstóls um að heimila fjölskyldu lamaðs manns að slökkva á öndunarvél hans.

Vincent Lambert hefur verið í dái í sjö ár eftir að hann lenti í mótorhjólaslysi og hefur fjölskylda mannsins átt í deilum um hvort beri að slökkva á öndunarvélinni.

Málið var vísað til Mannréttindadómstólsins eftir að æðsti dómstóll Frakklands heimilaði að binda enda á líf hins fertuga Lambert sem liggur inni á spítala í Reims í norðausturhluta landsins. Dómstóllinn úrskurðaði í dag að slíkt bryti ekki í bága við Evrópureglur.

Í frétt BBC kemur fram að málið hafi mikið verið rætt í Frakklandi þar sem líknardráp eru óheimil, þó að læknar geti stöðvað meðferð sjúklinga.

Eiginkona Lambert og hópur systkina hafa barist fyrir því að slökkt verði á öndunarvélinni eftir að læknar greindu þeim frá því að batahorfur væru engar.

Foreldrar hans og nokkur systkini eru hins vegar strangtrúaðir kaþólikkar og segja hann einungis þurfa betri læknismeðferð.