Fimmtíu létust í sprengjuárás Boko Haram

Fimmtíu létust er sprengja sprakk á fjölförnum markaði í Maiduguri í norðausturhluta Nígeríu í gær. Hryðjuverkahópurinn Boko Haram hefur lýst árásinni á hendur sér.

Tólf tíma útgöngubanni var lýst yfir í kjölfar sprengingarinnar í gær. Boko Haram hefur látið mikið að sér kveða í Nígeríu undanfarin misseri en nú um helgina réðust þeir inn í mosku og myrtu þar að minnsta kosti þrjátíu manns. Þá sendu þeir frá sér myndband í kjölfar árásanna þar sem þeir hótuðu að ganga skrefinu lengra, ásamt því að sýna frá morði á nokkrum nígerskum hermönnum og almennum borgurum.

Liðsmenn öfgasamtakanna hafa orðið meira en þrettán þúsund manns að bana frá árinu 2009 og hrakið um eina komma fimm milljónir frá heimilum þeirra.