Móðir Ronaldo vildi fara í fóstureyðingu

Móðir Cristiano Ronaldo, leikmanns Real Madrid, segir að hún vildi fara í fóstureyðingu þegar hún bar son sinn undir belti.

Þetta kemur fram í nýrri heimildamynd um Ronaldo sem er væntanleg í kvikmyndahús síðar í mánuðinum. Þar er fylgst með lífi Ronaldo utan vallar og samskiptum hans við fjölskyldu og vini.

„Ég vildi fara í fóstureyðingu en guð vildi ekki að það myndi gerast,“ segir Maria Dolores dos Santos Aveiro, móðir Ronaldo. „Cristiano var barn sem enginn vildi en hann hefur veitt mér svo mikla ánægju.“

Hún segir að faðir Ronaldo, sem glímdi við áfengissýki, hafi komið illa fram við sig þó svo að hann hlífði börnunum sínum. Enn fremur segir hún frá því að hún hafi haft það á tilfinningunni að hún hafi yfirgefið son sinn þegar Ronaldo fór frá heimabænum Madeira til Lissabon, þar sem hann gekk til liðs við Sporting tólf ára gamall.

Ronaldo segir að það hafi verið erfiður tími fyrir sig. „Ég grét hvern einasta dag,“ segir hann.