Ráðherrar senda Dönum samúðarkveðjur

Sigmundur Davíð Gunnlaugsson forsætisráðherra og Gunnar Bragi Sveinsson utanríkisráðherra hafa sent Dönum samúðarkveðjur vegna skotárásana í Kaupmannahöfn í gær.

„Óhugnalegar fréttir frá Kaupmannahöfn. Hugur okkar er hjá aðstandendum fórnarlamba og dönsku þjóðinni,“ skrifar Sigmundur Davíð á Facebok. Gunnar Bragi tekur undir með Sigmundi og segir fréttirnar frá Kaupmannahöfn hræðilegar. „Hugur minn er hjá Dönum í dag. Samfélög eiga að vera opin, frjáls og umburðarlynd,“ skrifar Gunnar Bragi.

Einn maður var skotinn í höfuðið nærri bænahúsi gyðinga við Krystalsgötu í miðbæ Kaupmannahafnar um miðnætti. Fyrr í gær lést fertugur Dani í skotárás við Krudttönden-leikhúsið. Sænski listamaðurinn Lars Vilks telur að hann hafi verið skotmarkið en ráðstefna um guðlast og tjáningarfrelsi fór fram í leikhúsinu.