Sara skoraði í Meistaradeildarsigri

Sara Björk Gunnarsdóttir var á skotskónum er lið hennar, Rosengård, vann 3-1 sigur á Verona í 16-liða úrslitum Meistaradeildar Evrópu í kvöld.

Sara Björk skoraði þriðja og síðasta markið í leiknum en hann fór fram á Ítalíu. Síðari leikurinn fer fram í Svíþjóð í næstu viku og Sara Björk og félagar hannar því í góðum málum.

Hin brasilíska Marta kom Rosengård yfir strax á sjöttu mínútu en Verona jafnaði metin á 30. mínútu. Sjö mínútum síðar komst Rosengård yfir á sjálfsmarki en Sara Björk innsiglaði sigurinn með marki á 77. mínútu.