Neymar óhlýðnaðist þjálfaraliði Brasilíu

Gilmar Rinaldi, yfirmaður knattspyrnumála hjá brasilíska landsliðinu, segir í viðtali við franska íþróttablaðið L'Equipe, að Neymar hafi ekki farið eftir fyrirmælum sínum og þjálfaraliðs Brasilíu í fyrsta leiknum í Suður-Ameríkukeppninni.

Neymar, sem var gerður að fyrirliða Brasilíu fyrir mótið, fékk rautt spjald undir lok fyrsta leiks Brasilíu gegn Kólumbíu þegar hann sparkaði bolta í átt að einum andstæðingi og reyndi að skalla annan.

Fyrirliðinn var úr skurðaður í fjögurra leikja bann og missti af restinni af mótinu. Stór ástæða þess hversu langt bannið var kom til vegna hegðunar hans í göngunum eftir leik.

Neymar átti ýmislegt eftir ósagt við dómara leiksins og lét hann heyra það í göngunum eftir leik. Starfslið brasilíska landsliðsins var búið að banna honum það.

„Ég sagði honum að passa sig því hann ber ábyrgð á eigin gjörðum,“ segir Gilmar, fyrrverandi heimsmeistari með brasilíska liðinu.

„Við lærum allir af þessu. Ég tók þátt í að gera hann að fyrirliða og ég sé ekki eftir því. Ég verð að búa til frábæran fyrirliða,“ segir Gilmar Rinaldi.