Riðill Englands á HM sterkastur

Vefsíðan sportingintelligence.com birti á Twitter-síðu sinni í dag skemmtilega grafík þar sem farið er yfir styrkleika riðlanna á HM miðað við stöðu liðanna á heimslista FIFA.

Samkvæmt henni er D-riðillinn sterkastur í honum leika England (10), Ítalía (9), Úrúgvæ (7) og Kosta Ríka (28).

Staða allra fjögurra liðanna í hverjum riðli er lögð saman og deilt með fjórum til að fá út meðaltalið.

D-riðilinn er í sæti 13,5, ef þannig má að orði komast, og er 0,5 stigum sterkari en G-riðilinn þar sem leika Þýskaland (2), Portúgal (4), Gana (37) og Bandaríkin (13).

Samkvæmt þessum útreikningum er F-riðillinn, sem inniheldur Argentínu (5), Bosníu og Hersegóvínu (21), Íran (43) og Nígeríu (44), sá slakasti en hann er í sæti 28,5.