Brooks og Gonzalez merkari menn en Abraham Lincoln

Stuðningsmenn bandaríska landsliðsins í knattspyrnu eru vægast sagt ánægðir með gengi sinna manna en þeir komust upp úr dauðariðlinum, G-riðli, í dag, þrátt fyrir tap í lokaumferðinni gegn Þýskalandi.

Menn beita ýmsum aðferðum til að fagna sigrum, en ein leiðin virðist vera að breyta Wikipedia-síðum leikmanna liðsins. Það gerðist bæði eftir fyrsta leikinn gegn Gana og aftur í dag eftir leikinn gegn Þýskalandi.

John Brooks, þýskættaður miðvörður Bandaríkjanna, reyndist hetjan í fyrsta leiknum þegar hann skoraði sigurmarkið með skalla eftir horn á 86. mínútu.

Eftir leik var búið að breyta inngangnum á Wikipedia-síðu hans, en þar stóð: „Hann er merkasti Bandaríkjamaðurinn síðan AbrahamLincoln var uppi.“

Lincoln, eins og allir vita, var 16. forseti Bandaríkjanna og lifir í minningu þjóðarinnar að eilífu fyrir að afnema þrælahald þar í landi.

Hvort það hafi verið sami stuðningsmaður eða einhver annar að reyna að vera jafnfyndinn, þá var Wikipedia-síðu miðvarðarins OmarsGonzalez einnig breytt eftir tapið gegn Þýskalandi í dag.

Gonzalez átti frábæran leik og var ein helsta ástæða þess að Bandaríkin fengu ekki á sig fleiri mörk, en Þjóðverjar sóttu án afláts í leiknum.

Að leik loknum var skrifað í niðurlagið á Wikipedia-síðu hans: „Hann sannaði með spilamennsku sinni að hann er merkasti Bandaríkjamaður sem til er. Hann tók þann titil af John Brooks sem jafnaði við Abraham Lincoln á dögunum.“