Hannes varði víti í enn einu tapi Sandnes

Hannes Þór Halldórsson markvörður Sandnes gerði sér lítið fyrir og varði víti í 3-1 tapi Sandnes gegn Strømsgodset.

Martin Oedegaard kom Strømsgodset yfir eftir tólf mínútna leik, en Henrik Furebotn jafnaði metinn sex mínútum síðar.

Í stöðunni 1-1 varði Hannes víti frá Thomas Soerum, en Gustav Wikheim kom gestunum í Strømsgodset yfir þegar átta mínútur voru eftir og tveimur mínútum síðar náði Thomas Soerum að bæta upp fyrir vítamistökin og gerði út um leikinn, 1-3.

Það gengur ekki né rekur hjá Sandnes en þeir eru í neðsta sæti deildarinnar með tíu stig eftir sautján leiki. Strømsgodset er hins vegar í öðru sæti, sex stigum á eftir Molde.