Pólverjar færa þúsundir hermanna til austurs

Yfirvöld í Póllandi munu færa þúsundir hermanna til herstöðva sem liggja við austurlandamæri ríkisins. Varnarmálaráðherra Póllands sagði blaðamanni AP fréttaveitunnar frá ákvörðuninni, en hún þykir minna á tíma kalda stríðsins.

„Aðstæður í stjórnmálum á svæðinu hafa breyst og við stöndum frammi fyrir stærstu öryggisógn Póllands síðan á tímum kalda stríðsins og við verðum að draga ályktanir af því,“ segir Tomasz Siemoniak, varnarmálaráðherra Póllands. Hann sagði að flutingurinn væri til kominn vegna átakana í Úkraínu.

Hann sagði að hermennirnir yrðu að mestu fluttir til þriggja herstöðva við landamærin og að vígbúnaður yrði einnig sendur þangað.

Siemoniak sagði þetta ekki vera gert í einhvers konar óðagoti, heldur væri skilvirkara að staðsetja hermennina í austri. Þrátt fyrir að Pólland hafi gengið í NATÓ árið 1999 er meirihluti hermanna ríkisins við vestur landamæri landsins.