Cameron segir ekki koma til greina að borga ESB

David Cameron, forsætisráðherra Bretlands, sagði breska þinginu í dag að ekki kæmi til greina að ríkisstjórn landsins borgi Evrópusambandinu (ESB) þær aukagreiðslur sem sambandið fer fram á. Greiðslan nemur 2,1 milljarði evra, eða rúmlega 320 milljörðum íslenskra króna.

„Bretland mun ekki borga neinum þessa tvo milljarða þann fyrsta desember og við höfnum þessari háu upphæð,“ sagði Cameron, sem seint verður talinn mikill stuðningsmaður ESB, í dag. „Við munum berjast gegn þessu á alla mögulega vegu.“

Upphæðin er reiknuð út frá því hversu vel hagkerfi aðildarríkja ESB hafa staðið sig frá árinu 1995. Ekkert ríki þarf að borga jafn mikið og Bretar en fyrir utan þessa aukagreiðslu mun ríkið leggja fram tæplega 1.700 milljarða króna til sambandsins á þessu ári.

BBC greinir frá. Á blaðamannafundi í dag sagði Jacek Dominic, fulltrúi Framkvæmdastjórnar Evrópusambandsins, að Bretar hefðu tvisvar haft færi á því að tjá sig um fyrirhuguðu greiðsluna formlega en ekki gert neinar athugasemdir.

Jafnframt sagði hann að ef Bretar borga ekki þann 1. desember muni sambandið myndi krefjast svara við því hvers vegna það hafi ekki verið gert. Eftir það muni sambandið beita sektum ef greiðslan berst ekki á réttum tíma.