Forsætisráðherra Suður-Kóreu segir af sér vegna ferjuslyss

Forsætisráðherra Suður-Kóreu, Chung Hong-won, hefur sagt af sér embætti vegna þeirrar gagnrýni sem upp hefur komið eftir mannskætt ferjuslys þar sem mörg hundruð námsmenn drukknuðu. 476 voru um borð í ferjunni og hefur björgunarmönnum tekist að ná 187 líkum á land en fjölda er enn saknað.

Ættingjar hinna látnu hafa gagnrýnt björgunaraðgerðirnar harðlega og einnig viðbrögð skipstjórnarmanna ferjunnar sem virðast hafa verið kolröng. Í sjónvarpsávarpi í gærkvöldi sagðist forsætisráðherrann vilja axla ábyrgð á málinu með því að segja af sér og um leið bað hann aðstandendur afsökunar fyrir slæleg viðbrögð í kjölfar slyssins.