Vatnstankur verður hringleikhús

Nýjasta afurð Stúdentaleikhússins verður sýnd í tómum vatnstanki undir Perlunni á morgun.

Leikhópurinn hefur undanfarið unnið hörðum höndum að því að setja upp verkið Stundarfrið eftir Guðmund Steinsson.

Tómur vatnstankur fellur ekki undir hið hefðbundna leikhúsform en leikstjórinn, Karl Ágúst Þorbergsson, segir rýmið að mörgu leyti henta hópnum ágætlega. „Við nýtum okkur svona svolítið form hússins. Það er ákveðin hringrás sem á sér stað á þessum tíma frá árinu 1980 til dagsins í dag sem smellpassar inn í þessa heimsmynd sem við vorum að reyna að endurskapa.“

Karl segir hópinn þó hafa þurft að laga rými vatnstanksins að þörfum sínum: „Sögusafnið var hérna áður, þannig að það var búið að mála allt rýmið svart. Það var rosalegt bergmál hér til að byrja með, sem var auðvitað mjög óþægilegt. Við sönkuðum að okkur öllum svörtum drapperingum á landinu held ég og klæddum rýmið með svörtu efni til að draga úr bergmálinu og bjuggum til hringleikhús.“