Gunni og Felix með barnafarsa

Æfingar hófust í gær á fyrsta leikriti félaganna Gunnars Helgasonar og Felix Bergssonar, Bakaraofninn – þar sem matargerð er lyst, sem verður frumsýnt í Gaflaraleikhúsinu í febrúar.

„Það var kominn tími fyrir leiksýningu. Það hefur alltaf verið í bígerð. Við skemmtum okkur gríðarlega við að leita leiða til að endurnýja okkur,“ segir Felix og bætir við hlæjandi að Sveppi hafi stolið af þeim hugmyndinni að bíómyndinni og því hafi þeir þurft að finna eitthvað annað í staðinn.

Bakaraofninn er fjölskylduleikrit sem fjallar um það þegar Gunni og Felix ákveða að opna veitingastað. „Það getur ekki farið nema illa. Frægasti matargagnrýnandi landsins er á leiðinni og þeir sitja uppi með pólskan iðnaðarmann sem er ákaflega klaufskur. Við köllum þetta barnafarsa. Við höfum ekki séð svoleiðis áður,“ segir Felix.

„Okkur langaði að gera leikrit sem er skemmtilegt en með týpískum Gunna og Felix skilaboðum.“ Ævar Þór Benediktsson og Elva Ósk Ólafsdóttir leika einnig í verkinu, Björk Jakobsdóttir leikstýrir og Máni Svavarsson sér um tónlistina.