Allt að þrjátíu manns létu lífið

Talið er að allt að 27 fjallgöngumenn hafi látið lífið í Himalajafjöllum þegar mikill hríðarbylur gekk þar yfir fyrr í vikunni. Veðurofsanum fylgdu snjóflóð en að sögn AP-fréttstofunnar er tala látinna sögð geta verið talsvert hærri.

Herþyrlur hafa þó bjargað allt að 140 manneskjum en þó er enn talið að í það minnsta sjötíu manns séu enn á staðnum þar sem mesti bylurinn gekk yfir, í um það bil fimm kílómetra hæð.

Veðurofsinn er talinn vera einn sá mesti sem komið hefur á þessu vinsæla göngusvæði sem ber nafnið Annapurna og er um 160 kílómetra norðvestur af höfuðborginni Katmandú.

Mikill fjöldi fjallgöngumanna hvaðanæva gengur þessa vinsælu leið á þessum árstíma vegna þess að veður er þá að jafnaði mjög hagstætt.

Í apríl á þessu ári fórust sextán nepalskir fjallgöngumenn í hræðilegu slysi í hlíðum Everest-fjalls og er það mannskæðasta slys sögunnar á þessum slóðum. Annapurna-svæðið er ekki svo langt frá þeim stað þar sem slysið varð í apríl.

Sérfræðingar segja að með hækkandi hitastigi á jörðinni verði slík snjóflóð í hlíðum fjalla enn algengari.