Allt annaðhvort bleikt eða blátt

Guðrúnu Töru Sveinsdóttur fatahönnuði og myndlistarkonu fannst vanta úrval af lífrænum barnafötum á viðráðanlegu verði hér heima, svo hún ákvað að taka málin í sínar hendur. Hún ásamt manninum sínum, Gísla Hrafni Magnússyni, eru að flytja inn barnafatamerkið PurerBaby.

Hún segist sjálf ekki hafa viljað vita kynið á sínu barni og þegar hún leitaði að fötum í hlutlausum lit var úrvalið ekki mikið. Þannig að þau leituðum að lífrænum fötum í hlutlausum eða ókynbundnum litum. „Við skoðuðum mikið barnaföt á netinu, því okkur langaði að fá lífræn föt fyrir son okkar. Við uppgötvuðum svo merkið PurerBaby og leist rosalega vel á það og ákváðum að slá til og hefja lítinn innfluttning og opna netbúð,“ segir Guðrún.

Hún segist hafa kynnst nýrri hlið á fataiðnaðinum þegar hún fór í starfsnám erlendis og það hafi vakið hana til umhugsunar um hvernig föt hún kaupi á sig og barnið sitt. „Við völdum þetta merki aðallega því við vildum geta boðið upp á lífræn barnaföt á viðráðanlegu verði. Bómullin í fötunum er ólituð og hefur ekki komist í snertingu við nein eiturefni og þeir sem vinna við að sauma þau fá sómasamlega greitt fyrir vinnu sína. Merkið er með GOTS gæðastimpil, sem er alþjóðleg lífræn og fairtrade gæða vottun,“ segir Guðrún.

Ásamt því að bjóða upp á vörur frá PurerBaby, er Guðrún að prjóna sokka og smekki úr lífrænni bómull sem er lituð með eingöngu náttúrulegum litarefnum. „Ég lærði hjá Jet Korine í Gloriu að lita með náttúrulegum efnum þannig ég þekki það ferli og stefni á að nota þá þekkingu í mína hönnun. Þetta tengi ég mikið við Slow fashion hugtakið, sem snýst um að gera vöruna persónulega, en ekki fjöldaframleidda,“ segir Guðrún.

En hversvegna skiptir litavalið á fötunum þau máli? „Það skiptir okkur máli vegna þess að við viljum ekki kyngreina börnin með litum. Það virðist vera inngróið í samfélagið að stelpur eigi að vera í bleiku og strákarnir í bláu, sem gerir það að verkum að framboðið af öðru er lítið,“ segir hún. Þau stefna að því að opna netverslunina á næstunni en byrja með sölu í gegnum facebook síðuna Eydalaliljaclothing.

„Við ætlum bara að byrja rólega og hafa fá eintök af hverju. Svo stefnum við að því að vera með pop up verslun líka svo ég hvet alla til þess að fylgjast með því á facebook síðunni okkar,“ segir Guðrún.