Ferðamenn í norðurljósaleit í stórhættu

Sveitarstjórnir Íbúar í Bláskógabyggð telja að skipulagðar norðurljósaferðir skapi hættu á vegum innan sveitarfélagsins, einkum á Lyngdalsheiði og á vegum innan þjóðgarðsins á Þingvöllum.

„Það sem skapar hættu er að hópferðabílar stoppa á miðjum veginum og hleypa farþegunum út. Fólk er svo að horfa á norðurljósin standandi á miðjum veginum eða í vegköntunum og uggir ekki að sér,“ segir Kristinn Bjarnason, formaður atvinnu- og ferðamálanefndar Bláskógabyggðar.

Kristinn segir að sveitarfélagið ætli að ræða málin við ferðaþjónustufyrirtæki og Vegagerðina og gera þeim grein fyrir hættunni. Hann segir að það séu útskot á vegunum þar sem rútur eiga að geta stoppað en það geti verið að bílstjórar og fararstjórar viti ekki af útskotunum. Þá geti komið tímabil þar sem útskotin eru lokuð vegna snjóa og það þurfi að ræða við Vegagerðina.

„Þegar er hálfskýjað eru bílstjórar að leita að norðurljósunum, það kannski opnast glufa og þau koma í ljós og þá er stoppað á punktinum og ferðamönnum hleypt út,“ segir Kristinn. Ekki sé langt síðan minnstu munaði að kona á bíl lenti á hópi ferðamanna sem stóðu á miðjum veginum og voru að horfa á norðurljósin.

„Þetta fólk var ekkert að fylgjast með umferðinni, það stóð á miðjum veginum í svartamyrkri og horfði hugfangið á norðurljósin. Ökumanninum var hins vegar mjög brugðið,“ segir Kristinn.

Kristján Daníelsson, framkvæmdastjóri Kynnisferða, segist hafa heyrt af því að menn séu að stoppa úti á vegum með fulla bíla af ferðamönnum. „Þetta skapar stórhættu,“ segir hann.

Kristján segir að mjög ákveðnar reglur gildi hjá Kynnisferðum hvað þetta varðar. „Þetta er bannað. Við skipuleggjum ferðir okkar þannig að það er stoppað á fyrirfram ákveðnum stöðum þar sem bílarnir komast út af veginum,“ segir hann. 

Talið er að um 100 þúsund manns hafi farið í skipulagðar norðurljósaferðir í fyrravetur, langflestir á suðvesturhorninu. Til að sjá norðurljósin er farið með ferðamenn á Reykjanesið, upp á Hellisheiði, á Þingvelli, upp í Hvalfjörð og Borgarfjörð.