Vísbendingar um að launamunur kynjanna aukist

Samkvæmt nýrri launakönnun er kynbundinn launamunur félagsmanna innan Starfsmannafélags ríkisins (SFR), eins stærsta stéttarfélags á Íslandi, að aukast. Óleiðréttur launamunur er 21 prósent. Meðalheildarlaun karla eru 469.885 en meðalheildarlaun kvenna eru 369.446.

Kynbundinn launamunur heildarlauna, það er þegar tekið hefur verið tillit til ýmissa þátta sem áhrif hafa á laun, mælist 10 prósent en mældist 7 prósent í fyrra og 10 prósent þar áður. Þó ber að taka fram að breytingarnar eru innan skekkjumarka frá síðustu könnun.

Capacent Gallup gerði könnunina í febrúar og mars en spurt var um laun 1. febrúar.

„Frá árinu 2007 hefur þessi munur verið allt frá 11 prósentum og farið allt niður í 7 prósent. Þá finnst mér athyglisvert núna að hann hefur hækkað aðeins,“ segir Árni Stefán Jónsson, formaður SFR. „Við höfum verið að reyna að fá ríkið til þess að reyna að gera einhverjar ráðstafanir og það virðist ekki skila sér. Núna þegar maður skoðar þetta þá virðast þetta vera einhverjar viðbótargreiðslur sem eru að koma til,“ segir Árni Stefán.

Hann segist ekki geta samþykkt að munurinn stafi eingöngu af því að karlmenn séu harðari í launaviðtölum og kallar eftir sérstökum aðgerðum til að breyta þessum launamun. „Ég get alveg fullyrt það að ríkisvaldið, sem er stærsti vinnuveitandinn okkar, er ekki að taka þátt í alvarlegum ráðstöfunum til þess að takast á við þetta,“ segir Árni Stefán.

Hjá Reykjavíkurborg er óleiðréttur launamunur kynjanna um 11 prósent en hefur verið um 16 prósent undanfarin ár. Sá munur er því að minnka. Karlar í fullu starfi eru með 446 þúsund krónur á mánuði en konur 395 þúsund. Kynbundinn launamunur heildarlauna, þegar tekið hefur verið tillit til annarra þátta, er 6 prósent en hefur verið um 8-10 prósent undanfarin ár.