Skrýtið að spila við stráka sem þú þekkir erlendis

„Þetta var nú meiri leikurinn. Bæði liðin höfðu spilað fínan varnarleik fram að þessu en ég veit ekki hvað gerðist. Það mætti halda að markið hefði verið eitthvað stærra í þessum leik, maður trúði þessu ekki,“ sagði Viðar Örn Kjartansson, framherji Valerenga, þegar Fréttablaðið heyrði í honum í gær.

Viðar virtist hafa tryggt Valerenga stigin þrjú þegar hann kom liðinu 5-2 yfir um miðbik seinni hálfleiks en Björn Daníel Sverrisson náði að skora jöfnunarmark Viking í uppbótartíma og lauk leiknum með 5-5 jafntefli.

Viðar hefur nú skorað fimm mörk í síðustu þremur leikjum eftir að hafa ekki skorað í fjórum leikjum í röð og er hann lang markahæstur í deildinni með átján mörk í átján leikjum.

„Ég var búinn að vera óheppinn í undanförnum leikjum og ég vissi að ég myndi byrja að skora aftur fljótlega. Ég var að fá færin en ég var að setja hann í slánna og ég vissi að þetta myndi koma.  Þetta voru allskonar mörk sem ég skoraði í leiknum og það er jákvætt fyrir liðið að ég skori fjölbreytt mörk,“ sagði Viðar.

Fimm Íslendingar voru í liði Viking í leiknum og komu alls fimm íslensk mörk en ásamt mörkum Viðars og marki Björns Daníels bætti Indriði Sigurðsson við marki.

„Það er mjög skrýtið að heyra íslensku út um allan völl þegar þú ert að spila erlendis. Maður þekkir alla þessa stráka og það er skrýtið að spila við stráka sem þú þekkir erlendis. Ég veit ekki hvort þetta sé þægilegt eða óþægilegt, þetta er öðruvísi,“ sagði Viðar sem hafði betur gegn Sverri Inga Ingasyni í leiknum.

„Hann hefur átt leiki sem hann er með mig í vasanum og svo er það öfugt líka. Ég átti góðan leik á laugardaginn en það var bara ekki spiluð vörn í þessum leik,“ sagði Viðar.