Füle segir ESB enn opið fyrir aðildarumsókn Íslendinga

Stækkunarstjóri Evrópusambandsins, Stefan Füle, sagði í ræðu sinni á Evrópuþinginu í gær að sambandið hafi enn vilja til að halda áfram aðildarviðræðum Íslands að sambandinu, vilji Íslendingar halda viðræðunum áfram.

Í ræðu sinni fór Füle yfir stöðu aðildarumsóknarinar. Hann sagði ástæðuna fyrir því að sambandið hafi hætt styrkveitingum á svokölluðum IPA I styrkjum hafi verið sú að ekki sé réttlætanlegt að skattgreiðendur aðildarríkja Evrópusambandsins greiði fyrir slíka styrki þegar íslensk stjórnvöld hafi einhliða ákveðið að stöðva aðildarviðræðurnar.

Evrópusambandið hafi síðan í samráði við íslensk stjórnvöld hætt við styrkveitingar á IPA II styrkjum sem áttu að koma til framkvæmda á árunum 2014-2020. Í niðurlagi ræðunnar hvatti Füle þingið til að halda opnum hug gagnvart umsókn Íslendinga, boltinn væri hins vegar núna hjá íslenskum stjórnvöldum.