Santos tekur við Portúgal

Fernando Santos hefur verið ráðinn nýr landsliðsþjálfari Portúgals. Santos, sem er Portúgali, tekur við starfinu af Paulo Bento sem var rekinn eftir að Portúgal tapaði fyrir Albaníu í undankeppni EM 2016 fyrr í mánuðinum.

Santos var síðast við stjórnvölinn hjá gríska landsliðinu. Hann stýrði því í síðasta sinn gegn Kosta Ríka í 16-liða úrslitum á HM í sumar. Santos var rekinn upp í stúku fyrir mótmæli í þeim leik, sem Grikkland tapaði eftir vítaspyrnukeppni, og í kjölfarið dæmdur í átta landsleikja bann. Þjálfarinn áfrýjaði úrskurðinum, en mál hans verður tekið fyrir í vikunni.

Santos, verður sextugur í næsta mánuði, hefur m.a. stýrt Porto, Benfica og Sporting í heimalandinu og AEK Aþenu, Panathinaikos og PAOK í Grikklandi.

Næsti leikur Portúgals er vináttuleikur gegn Frakklandi í París 11. október. Þremur dögum síðar sækja Portúgalir Dani heim í undankeppni EM 2016.